申博Sunbet官网

定海神针唔修补 香港睇怕好快冇

正所谓,亡羊补牢,未为晚也。定海神针唔断都断咗,为今之计係拿拿临谂吓点补镬。有堪舆学家建议,如果复修需时,庙祝可以先做一支铜造嘅仿製品顶住档先,只要高过旁边嗰支,就可以挡煞。佢又警告,定海神针对香港安定有好大作用,如果唔尽快整番好,未来可能仲有排乱,唔係讲玩o架。

冇错喇,事关香港安危市民福祉,梗係宁可信其有啦。可惜,市民急当局唔急,神针倒塌后,街坊搵古蹟办帮手,点知对方一味歎慢板,话正进行结构检查,以便制订合适维修方案,又话会以公开招标方式,委聘合资格承建商进行复修工程喎。

即係咁,港产官僚做嘢出名拖拖拉拉、甩甩漏漏,等佢哋研究完招标完,唔知又要拖几耐。试谂吓,家阵香港七国咁乱,佔领闹剧没完没了,经济被破坏,民生受影响,连法治根基都摇摇欲坠,继续拖落去,香港好快就玩完,到时有定海神针都救唔番喇。

唔係危言耸听o架,虽然话玄学嘅嘢信不信由你,但有时灵起上嚟唔到你唔服。好似有「门常开」之称嘅政府总部咁吖,犯咗「穿心煞」嘅风水大忌,启用后果然头头碰着黑,港府固然撞板多过食饭,社会更係七国咁乱,家阵仲爆发佔领闹剧添。所以话啫,三分人事七分天,凡事都係小心啲好。退一步讲,即使港产官僚多数饮洋奶水长大,信天主多过信风水,但唔好唔记得喎,洪圣古庙係法定古蹟,当局本来就有责任保育,点可以阔佬懒理,关人个关o架。

讲起保育,真係唔提犹自可,一提把几火。港府年前将千几幢建筑物列为历史建筑,点知当中七成属私人物业,结果引发极大争议,有啲业主怕烦,索性将建筑物一拆了之,保育变成毁育,港产官僚添烦添乱,旨意佢哋保育历史遗产,真係蚊都瞓蛇都死喇。

唉,流水落花春去也。香港过去被视为福地,创下无数奇迹,点知回归后风风雨雨,纷纷扰扰,简直永无宁日。家阵定海神针仲断埋,佔领闹剧难以收科,唔通香港真係气数已尽!