申博Sunbet官网

歌舞昇平放烟花 其实香港年年差

年初一暴乱开年,简直大吉利是,最讽刺嘅係,当局歌舞昇平嘅节目源源不绝,又花车巡游,又烟花汇演,好似庆祝咁款,同社会气氛完全格格不入。古诗有云,不道江南春不好,年年衰病减心情。其实今日唔少港人都有呢种感叹,花车巡游唔係话唔好睇,烟花汇演更加普天同庆,之不过香港今不如昔,愈嚟愈乱,仲点有心情欣赏吖?今年烟花汇演大搞噱头,发放二万三千八百八十八枚,包括砌出六十张猴子笑脸图案,寓意笑迎猴年,可惜吖,香港家阵动荡不安,变成乱迎猴年。

话时话,香港政局纷乱,令人笑唔出嘅又点止暴乱吖。立法会近年深陷政治泥沼,唔係拉布就係流会,唔係掟嘢就係爆粗,七国咁乱,几乎无做过一件正经事,睇见都令人眼冤。其实,反对派政客为反而反,瘫痪议会,骑劫社会,亦係另一种形式同暴动嚟(口架),分别只係所用嘅武器唔係砖头同铁通,而係拉布同流会。立法会发挥唔到为民喉舌嘅职能,反而沦为社会乱象嘅根源,点能够唔令人忧心吖?

香港除咗政治纷乱,经济民生一样唔掂。随着外围环境不断恶化,加上旅游业及零售业等支柱行业无以为继,本港整体经济阴霾密布,危机四伏,新春市道就係一个清晰警号嘞。寻日係车公诞,有车公庙外摆卖嘅档主大呻,今年生意大跌三分之二,係十几年来最差嘅一年;有上环老字号海味舖亦话,海味生意近年一直下滑,旧年更加下跌一成,形容係开业四十九年来最恶劣嘅时刻,究竟经济大环境差成点,画公仔唔使画出肠喇。至于民生问题咯喎,更加唔使嘥口水,教育、医疗、房屋、安老、食物安全等冇瓣掂,民生早就变成「民怨」,问你点顶。

所以话,新年流流,市民都好想笑口常开,暂时抛却烦恼,好好欣赏花车同烟花,但可惜现实好难做到。冇计喇,香港沉沦,豺狼当道,政客固然无良,官僚同样无能兼无德,烂泥扶不上壁,就算社会要求设立全民退休保障制度嘅呼声不绝于耳,佢哋照样当听唔到,港人想过安乐日子都难喇。最匪夷所思嘅係,假难民问题愈演愈烈,沦为社会不稳定嘅最大隐患之一,当局拆弹依然软手软脚,净係呢样已经令香港冇运行喇。

「金猴奋起千钧棒,玉宇澄清万里埃。」讲到尾,人定胜天,如果港人好似灵猴咁机智灵活,宽厚亲和,就算遇到乜嘢逆境,都可以逢凶化吉。怕就怕港府係是非不分嘅昏僧,纵然孙大圣有降妖除魔之能,都係徒叹奈何嘅咋。