申博Sunbet官网

店舖阻街老大难 执法切忌一阵风

店舖阻街问题有几严重,斋睇数字就知,过去三年食环署共检控近六万宗违例个案,记者去旺角、深水埗等阻街黑点巡视后亦发现,店舖「佔领街道」各出奇谋,有人将货品放到旁边未开门嘅店舖,有人甚至索性将街道名牌当「陈列架」,部分道路撞正维修工程,搞到人车争路,真係睇见都牙烟。

话时话,店舖阻街已经唔係今时今日嘅事,情况之所以多年冇改善,皆因负责部门互相推庄,多人管等于冇人管。之前申诉专员公署对此有非常生动嘅描绘,食环署、地政总署及屋宇署等执法部门各自为政,各部门倾向矮化自己角色,减少执法行动嘅积极性。亦即係话,官老爷一个二个好似佢哋老顶咁「推比人」上身,唔七国咁乱至奇喇。

咁就难怪当局宣布取缔店舖阻街,即时定额罚款千五蚊,大部分市民都举脚赞成。不过问题嚟嘞,区区千五蚊究竟有几大阻吓作用呢?当局之前同样将垃圾虫定额罚款提升至一千五百元,结果情况冇改善不特止,检控数字反而多咗,更何况店舖打开门做生意?有办你睇,好多食肆一到夜晚就好似攞正牌咁霸晒半条街,搞到四围乌烟瘴气,居民怨声载道,罚极都冇改善,讲到尾咪因为罚款计埋入成本,「除笨有精」啰。

所以话,食环署取缔店舖阻街唔係话唔啱,但如果只係做骚咁做,风头过后一切打回原形,都係嘥气嘅啫。当局运动式执法大家都见识唔少,好似全城清洁运动咁吖,隔几年就大锣大鼓上演一次,结果衞生黑点几十年如一日;又好似打击违例泊车咁,警方派完一轮牛肉乾之后就偃旗息鼓,结果马路仲塞过旧时。

再讲吖,阻街嘅绝对唔止店舖咁简单,当局头痛医头,做啲唔做啲,点都唔啱数。好似宣传易拉架通街乱放咁,同样係老大难问题,净係旺角行人专用区,每逢假日易拉架就十足十八卦阵一样,加上宣传人员沿街拉客,乱过乱世佳人;仲有流动广告灯箱,简直係五步一楼,十步一阁,阻碍行人事小,电线乱咁驳出街随时引发火警事大,对于呢啲乱象,当局居然只眼开只眼闭,同锯掉箭头嗰位蒙古大夫有咩分别吖。

始终都係古人讲得啱︰一屋不扫,何以扫天下。港产官僚连店舖阻街咁简单嘅问题都管唔掂,旨意佢哋处理国计民生嘅大事,蚊都瞓蛇都死喇!