申博Sunbet官网

后顾之忧未解决 取消对沖也枉然

最近政府放风,话行会通过取消强积金对沖划线方案,延长政府对僱主补贴期至廿五年,补贴金额亦会由原来一百七十二亿元劲增至近三百亿元,听闻资方对呢个方案比较接受,林郑有望当成政绩喺施政报告提出。讲真,取消强积金对沖由上届讲到今届,劳资双方一直鸡同鸭讲,今次资方之所以收货,无非係港府大慷纳税人之慨,既大幅延长补贴期,又大手笔加码补贴,即係用公帑买政绩咋。

冇计嘞,港府根本无法摆平商界,偏要摆出为民请命嘅模样,咁港府有的是钱,惟有花钱买平安啰。不过咁,商界虽然话呢个方案体现港府有承担,但其实一样锱铢必较,要求补贴百分比要划一为百分之五十,又建议喺补贴期内,专项储蓄户口若不足以支付遣散费或长期服务金,政府要包底喎。所以话,逐利係商人本性,方案细节最终係点,仲要睇过至知。

讲开强积金,真係一壳眼泪。唔止蚀多赚少,手续费高昂,就算取消对沖亦不过小修小补,不足以安享晚年。讲到尾,要让打工仔过有尊严嘅退休生活,全民退保係不二之选,可惜吖,港府善财难捨,一时以结构性财赤恐吓市民,一时挑拨穷人斗富人、青年斗长者,总之就係将全民退保妖魔化,林郑仲同研究退保嘅资深学者隔空驳火,简直唔知丑字点写。港府明益金融界,画公仔唔使画出肠喇。

最可笑係,面对人口老化加剧,安老问题迫在眉睫,高官唔係未雨绸缪,反而大玩拖字诀,一味以富贵长者屋、银色债券同埋年金搪塞,只知锦上添花,拒绝雪中送炭,结果反应冷淡,形同虚设。搞到冇嘢好搞,仲噏埋「少老」、「年长人士」等名堂,要求社会延长退休年龄,但就全无配套支持。你话喇,今时今日除咗过气高官能够无限翻阉,又有几多僱主愿意聘请长者吖,连港府都冇带头做好榜样,资方当然睬你都傻。

呢个政府就係咁嘅嘞,将百亿千亿公帑兴建大白象工程,天经地义;将每年十几亿公帑倒贴无恶不作嘅假难民,甘之如贻;一讲到搞好医疗、安老及退保咯喎,耍手拧头唯恐不及。坚离地高官不理民间疾苦,只知自吹自擂,认屎认屁,公公婆婆想安享晚年,真係唔使旨意。